(zomi community usa)

GENVAI

ZIUSA GENVAI TAWH KISAI DOTNA LEH DAWNGNA (20)

1.      ZIUSA Genvai i cih in bang hiam?

a.       ZIUSA genvai akihel Zomi khatpeuh in sihna atuah leh a luang akipham theihna ding, ahih kei leh, a luang akivuipih zawh nading ki panpihna hi.

2.      ZIUSA Genvai ah kihel theih nang bangteng kisam hiam?

a.       Thu (3) kisam hi:

                                           i.      USA leitaang tunga om Zomi khatpeuh hih ding kisam hi.

                                           ii.      ZIUSA pawlmikhat hih ding kisam hi.

                                           iii.      Akiciangtan zah sum piak ding leh thu-te puak ding kisam hi.

3.      ZIUSA pawlmikhat koi bangin kisuak thei ding hiam?

a.       ZIUSA pawllut Zomi innkuan khatpeuh i pawlmi ZIUSA pawlmi hi pah hi.

b.      ZIUSA pawllut Zomi innkuan a om loh na munte pan in mimal dinmun tawh ZIUSA pawlmi kilut thei hi. Akiciangtan sum leh akisam thu-te puak ding kisam ding hi.

4.      ZIUSA Genvai luttheih nang bangzah piak ding kisam masa hiam?

a.       ZIUSA pawlmi ahi-sakhat in Genvai aluttheih nang piakkholh kivuina sum donkhat tawh a kikim DEPOSIT ( Sumbulpi) leh ZIUSA Genvai Tanute in genvailut-thak theih ding taangkona hong neih hunhun-aa kidongkhol piakkholh kivuina sum don aki ciangtan zahzah piak ding kisam hi.

 

5.      ZIUSA Genvai ah banghun teng in kilut thei hiam?

a.       Kumkhat sungin January, April, July, October khateng in kilutthei hi. Akisam sum leh thu-te ZIUSA Genvai Tanupi tungah akiciangtan hun in puak ding kisam hi.

b.      ZIUSA Genvai Tanupi in genvailut ding zotna laikhahna luttheih-kha kipatma in luttheih ding vaitawh kisai taangkona kinei zel hi.

6.      ZIUSA Genvai ah alut nuam khat kua tawh kizom ding hiam?

a.       ZIUSA pawllut Zomi innkuan khatpeuh pawlmi ahih leh akipawlna Zomi innkuan i aseh genvai tanu tungtawn in kizopna nei thei ding hi.

b.      ZIUSA pawllut Zomi innkuan khatpeuh in ZIUSA Genvai tawh kipawlna Zomi innkuan min tawh kizopna a neih kei leh ZIUSA Genvai Tanupi tawh direct in kizom thei ding hi.

c.       ZIUSA pawllut Zomi innkuan a om lohna munte pan ZIUSA ah mimal in lut-a ZIUSA Genvai a kihel khatpeuh in ZIUSA Genvai Tanupi tawh direct in kizom thei ding hi.

7.      ZIUSA Genvai alutkhat in banghun ciang piakkholh kivuina sum (Premium) piakkik zel ding kisam hiam?

a.       ZIUSA Genvai Tanute in piakkholh kivuina sum (Premium) donkikna hongneih hunhun ah piakzel ding kisam hi. Hih lai aki at hun in, sum piakkik hun ding taangko Ni akipan Ni (45) hun kipia ding cih leh anuai-a zah piak ding in ciangtanna kinei hi. (Ahun zui in kilaihna om thei ding a, Genvai Tanupi in ahun zui-in hong Taangkona aki mang, zuih ding hi ding hi).

b.      Don (1) piakding zah:

                                          i.      Single khat              : $ 6

                                          ii.      Nupa kop khat         : $ 7

                                          iii.      Nupa + Ta (1)         : $ 7

                                          iv.      Nupa + Ta (2)         : $ 8

                                          v.      Nupa + Ta (3)          : $ 9

                                          vi.      Nupa + Ta (4)         : $ 10

                                          vii.      Nupa + Ta (5)         : $ 11

                                          viii.      Nupa + Ta (6)        : $12

                                          ix.      Nupa + Ta (7)          : $13

8.      ZIUSA Genvai lutkhat a sih leh bang hih ding kisam hiam?

a.       ZIUSA pawllut Zomi innkuan khatpeuh pan ahih leh akipawlna Zomi innkuan i aseh genvai tanu, ahih kei leh akizoppih Zomi Innkuan makaipite tungtawn in ZIUSA Genvai Tanupi tungah sihkohna zaksakna neihpah ding kisam hi.

b.      ZIUSA pawllut Zomi innkuan min tawh genvai ah kizopna aneihloh namun, a hih kei leh ZIUSA pawllut Zomi innkuan om lohna munte pan ZIUSA mimal in a lut ahih leh a innkuanpih, a meltheihbul khatpeuh in ZIUSA Genvai Tanupi tungah sihkohna zaksakna neihpah ding kisam hi.

9.      ZIUSA Genvai akihelkhat a sih leh sihvuina sum bangzah ngahthei ding hiam?

a.       Genvai akihelkhat in sihna atuah hunhun in, genvai akihel zawh asawtzah zui, ahih kei leh naungeek ahih leh Genvai akihelkhat i sungpan a suah hun asawtzah zui in sihvuina Sum (Death Benefit) akicaingtan zahzah ngah ding hi.

b.      Genvai akihel khat in sihna atuah hun in, Genvai akihel zawh Ni (60) acing nailote atampen akiciangtan Sihvuina Sum ( Death Benefit) i 25%, Ni (60) pan Ni (120) acing nailote ( Ni 60 pan Ni 119 kikal) te 50%, Ni (120) pan Ni (180) acing nailote ( Ni 120 pan Ni 179 kikal) te 75% leh Ni 120 acingkhinsate 100% kipia ding hi.

c.        Hih lai aki-at hun in, Sihvuina Sum 100% pen $ 1,5000.00 ( Tulsawm leh Tulnga) in kiciangtan hi. Ahun zui-in akilaihna aom leh tua akilaih thak ciangtan zahzah Sihvuina Sum a ngah ding hi pah ding hi.

d.      ZIUSA Genvai lutkhatpeuh sungpan asuak naungeek khatpeuh asih leh tua naungeek in Sihvuina Sum a ngah theihna ding in, tua naungeek ahinga-a asuakkhia naungeek-leh hanmual ah ngeina cing-a a kivui ding hi ding hi.

10.  ZIUSA Genvai akihel khinsakhat a tawpkik leh koi bangin kihel kik thei ding hiam?

a.       ZIUSA Genvai akihel khinsa khat amah leh amah thu in atawp, ahih kei leh aki tawpsak khat akihel kik nop leh a kihel ngei nailo khat mah bang in akisam thu-te leh sum piak ding kisam hi. Ahi zong Genvai ah abeisa hun-in akihelsa Ni phazahzah Genvai ah akihelzah ni kisimna ah kisimsak,kihelsak ding hi.

11.  ZIUSA Genvai akihel khinsa khat kum (21) acing teh bangteng hih ding kisam hiam?

a.       Kum 21 a cingma a Nu/Pa khatpeuh, ahih kei leh Nu leh Pa Genvailut hihna tawh genvai lutkhatpeuh in kum 21 a cinghun ah Genvai lutthak san hun(Jan, April, July, Oct)te ah kum 21 cinna theihsakna neih dingleh, akisap leh sum piakbeh ding kisam ding hi.

b.      Genvai lutthak san hun atung masa kha abeima siah genvai lutkhat hihna paisuak ding-a, theihsakna aneih theihhun ah theihsakna a neih kei leh genvailut ahihna bei ding hi.

12.  ZIUSA Genvai ah akihel khinsa khat in a zi/a pasal, kum (21) cingnailo a ta khatpeuh, asuakcil naugeek khatpeuh genvai lutsak nuam leh bangteng hih ding kisam hiam?

a.       Single min tawh Genvai lutsa khatpeuh in genvai alutsa a zi/a pasal tawh innkuan min tawh alaih nop leh piakkholh kivuina sum (Premium) donhun khatpeuhpeuh ah innkuan min tawh laih thei ding hi. Akisam aom leh sum piakbeh ding kisam ding hi.

 

b.      Single min tawh Genvai lutsakhatpeuh in Genvai alut nailo a zi/a pasal lutsak nuam-a innkuan min tawh alaih nop leh Genvai lutthak san hun (Jan, April, July, Oct) te ah lut sakthei ding hi. Akisam a om leh sum piakbeh ding kisam ding hi.

 

c.       ZIUSA Genvai lutsa khatpeuh sungpan a suak naugeekkhat Genvai lutthak san hun ( Jan, April, July, Oct) te ah naugeeksuak min leh a kisam sum ( piak ding akisap leh) tawh theihsakna nei ding hi.

 

d.      Zomi Innkuan USA Genvai Thukhunpi apom Zomi khat in ama sungpan asuak naugeekkhat i min leh akisam sum aom leh anau suah akipan akinai penpen, atung masa penpen genvai mithak san hun ah minpiakna nei dinghi. Aki naipenpen, atung masa penpen genvai mithak san hun ah min leh akisam sum puakna akineih kei leh tua naugeek asih leh sihvuina sum ngah lo dinghi.

13.  ZIUSA Genvai ah USA hong zinpakkhat koi bangin hong kihelthei ding hiam?

a.      USA leitaang tunga om Zomi khatpeuh, a zinpak, ateng, sangkah cih bang in a tuam in khentuamna kinei lo a, akisam thu-te tawh kituak-a sum pia khat genvai lut thei hi.

14.  ZIUSA Genvai tawh kisai kivai puakzia koi bang hiam?

a.       ZIUSA Board of Directors: ZIUSA Genvai Thukhunpi puahna, behlapna tawh kisai leh ZIUSA Genvei Deposit (Sumbulpi) zatzia ding vai ah thunei

 

b.      ZIUSA Executive Officers: ZIUSA Genvai Thukhunpi ah kiciantak in a gencian zawhlohna munte ah hilhcianna a pia ding leh sihvuina sum piakvai ah thunei

 

c.       ZIUSA Genvai Tanu Pawl: ZIUSA Genvai maban khatpeuh, kizopna khatpeuh ah a mapang, atanu-te

 

15.  ZIUSA Genvai bang kum in aki pan hiam?

a.       ZIUSA Kumcin Khawmpi-2013 (July 06, 2013), Tulsa, OK, hun sung Khawmpi Thukikupna pan ZIUSA in Genvai neih ding in thukimna kinei hi.

b.      Genvai akineihma in, ZIUSA pawlhuam sungah Donghu cih tawh sihgaalna kineih ding leh paakkual tawh kikhakna neih ding in kithukimna kinei khin hi. (ZIUSA/EC-08/2009-2011: Jan 6, 2011, Tulsa leh Kumcin Khawmpi 2011: July 2-3, 2011, Atlanta kithukimna).

16.  ZIUSA Genvai leh ZIUSA Donghu bang kilamdang hiam?

a.       Anih in Pawlmi khatpeuh in sihna atuah hun ah kigaalna, luangkiphaam nang deihna tawh aki vaihawm ahihi. ZIUSA Donghu ahih leh Pawlhuam Zomi Innkuan Kipawlna/Taangmi zui, Biakna Pawlpi miphazah zui-in akiciangtan zah tawh kipawlkhawm in pawlmi khatpeuh sihna aom hun ah kigaal na hi-a, ZIUSA Genvai ahih leh akiciangtan zah sum leh akisam thu-te apuak teng sungpan bek sihna atuak aom hun ah kigaal, luang kiphaamna hi. Paakkual tawh kikhakna ahih leh USA a om Zomi khatpeuh in sihna atuak leh paakkual khat tawh kikha hi.

17.  ZIUSA Genvai ah mi bangzah kihel in, Genvai lut sungpan sihna atuak Sihvuina Sum mi bangzah ngah khin hiam?

a.       Tu laitak ZIUSA Genvai alut mimal 11,000 (Tulsawm leh Tulkhat) val khin in, November 19, 2019 ni pan June 20, 2019 ciang Genvai lut sungpan asi mimal (74) kipha in, Sihvuina Sum $664,900.00 kipiakhia hi. Sihvuina Sum atampen ciangtanna November 19, 2019 in $3,075 (100%) hi in, June 20, 2019 in $15,000 (100%) kipia hi.

18.  ZIUSA Genvai kua in mapang deuh hiam?

a.       ZIUSA Genvai ahih leh Genvai Thukhunpi zui-in term zui-in akiteel Board of Directors leh akicial Executive Officers, Secretary of Genvai ten  thuneihna leh mawhpuak atuamtek nei uh hi. Pu Tual Sawm Lian (Genvai Tanupi), Pa Cin Khen Thang (Genvai Thusapi), Pa Nang Lam Thang (Genvai Thusapi) leh Pu Thang Mun Mang (Genvai Tanupi) cihte in abeisa hunsung in Genvai tanu lam mapangna nei uh hi. Pu Tual Sawm Lian in kumtampi Genvai Tanu lam makaih in, Pa Nang Lam Thang in Excel Master File kician khat Genvai a ding bawl hi. Pu Do Khan Khup in ZIUSA Genvai Thukhunpi tawh kisai a kipatpan in geelmasaknate gelh (Blueprint) in, ahunzui-in akipuah Genvai thukhunte update na nei zel hi. Pu Go Sawm Khup in Genvai Thukhunpi geelmasaknate etdik sak hi.

19.  ZIUSA Genvai tawh kisai dotnopna a om the kua tawh kizom ding?

a.       ZIUSA Genvai tawh kisai thukhat peuhpeuh kizopnopna aom leh ZIUSA Genvai Tanupi tungtawn in ki dong, kizom thei hi.

20.  Hih Dotna Dawngna te ZIUSA Geivai Thukhunpi ahi pah hiam?

a.       Hih dotna leh dawnna pen ZIUSA Genvai Thukhunpi zui-a telbaih theihnang lunggulhna tawh hilhcianna hi bek-a, ZIUSA Genvai Thukhunpi hi lo hi. ZIUSA Genvai Thukhunpi sunga akicih, aki at bangbang zuih ding ahhi. A hunzui in ZIUSA Genvai THukhnpi akilaihhun ah hih Dotna dawngna zong laih ding kisam ding hi.

 

Genvai Thukhunpi zui-in a gelh – Pu Do Khan Khup, Executive Director

                                                      Date:  July 3, 2019


ZIUSA GENVAI THU KHUN: